أسباب الروشه أو هز الرقبه أو التوائها أو أعرض الجمل في الطيور و الحيوانات
الأول لازم نعرف أن الحاله ده عرض لعدة أمراض سواء فيروسيه أو بكتيريه أو حشريه أو نقص عناصر أو التعرض لمواد سامه أو كسور وتشوه عظام الرقبه كما يلي
- الأسباب الفيروسيه المصاحبه للعدوى بالنيوكاسيل وممكن انفلونزا الطيور في الدواجن نلاحظ معها أعراض عصبيه وكما هو معلوم الوقايه بالتحصين للسليم قبل الاصابه كل ١٢ شهر وبعد الاصابه الاهتمام برافعات المناعه
- الأسباب البكتيرية زي الاصابه بالسلامونيلا وخصوصا في الطيور أو مرض الليستيريا (Listeriosis) وخصوصا في الثدييات الانتنه الدمويه المصاحبه ليها بتسبب جلطات و بالتالي انسداد أو ضيق ورود الدم للاعصاب خصوصا بالرقبه بالاضافه إلى أعضاء أخرى وتعرف بالعقد الثابته وعلاجها التحصين للسليم قبل الاصابه كل ٨ شهور وبعد الاصابه استخدام مضاد حيوي مناسب وأضافه قرص اسبرين أطفال على لتر ماء أو جرام فيتامين C على لتر ماء مع مجموعه فيتامين B لتقوية الأعصاب
- التهاب الازن وخصوصا بالاصابات الحشريه متنوعه من البق او القمل أو دخول سائل من الاستحمام أو ديدان الأنف و القصبه الهوائيه بيخلي المريض يحاول تحريك الراس والرقبه في عده اتجاهات محاولا إخراج هذه الديدان وان كان نادر الحدوث في الطيور إنما منتشر في الأرانب والحيوانات وعلاجه استخدام مضاد حشري مناسب
- نقص العناصر المعدنيه والفيتامينات وده حاله متكرره وخصوصا في الطيور والحيوانات الحبيسه وأهمها نقص فيتامينات ب وخصوصا ب١٢ و نقص البوتاسيوم و نقص ه سيلينيوم وعلاجها إمداد الطائر باحتياجاته منها بانتظام
- في حالات بيظهر روشه في الزغاليل أو الحيوانات حديثه الولاده من وجود كدمات أو ضغط على عظام الرقبه أثناء الخروج من البيضه أو الولادة أو من تعرضهم لكدمة من تشاجر الأهالي أو السقوط وده بنسبه كبيرة في الطيور و الأرانب بتتحسن لوحدها بدون اي تدخل عدا الحيوانات الكبيره قد تحتاج لتدخل طبيب بيطري طبقا لنوع الاصابه
- تعرض الطيور و الحيوانات لسموم بتؤثر على الأعصاب وخصوصا البودره الحشريه لأن تأثيرها اساسا هو إتلاف الوصلات العصبيه وتعمل شلل في أعضاء جسم الحشرة أو القوارض وان كان بيستخدم حاليا للقوارض سموم مسيله للدم وده علاجها مضادات سموم ولبن وفي بعض الأحيان الحقن بالاتروبين وطبعا في الحيوانات يلزم تدخل طبيب بيطري والأفضل تجنب استخدام أي مبيد حشري بودر للطيور لأنها بترفرف وتنثره وتتنفسه وتتاثر بيه بسهوله
- انتشار العدوى وانتقالها للأبناء بتختلف حسب نوع الاصابه مثلا النيوكاسيل الحمام الناجي من الاصابه لا ينقل العدوى و أثناء الاصابه دوره الفيروس حوالي ١٥ يوم لاما القطيع بيموت أو ينجو منه بعض الأفراد ولو الحمام محبوس الكل بيصاب وفي أفراد ليها قدره طبيعيه على المقاومه لارتفاع مناعتها بينما السلامونيلا ممكن تكون موجوده مع الحمام طوال عمره و ما يظهرش عليه أعراض المرض لارتفاع المناعه بس بيظهر على الزغاليل لانخفاض مناعتها وخصوصا بعد ١٥ يوم بخلاف كبس البيض وده لازم كورس علاجي قوي أسبوع وراحه أسبوع و يكرر وبالنسبه للمواشي ده موضوع كبير جدا ولازم حقن بانتظام وتدخل طبيب بيطري وان كانت الاصابه بين الحيوانات نادره جدا جدا عكس الطيور والارانب منتشره
طبعا في تجارب كتير للعلاج بعضها قد ينجح عند مربي ولا ينجح عند الآخر وده ببساطه لأن أسباب الروشه مش حاجه واحده أسباب كتير وده ملخص سريع ليها ؛ ومعظم حالات الروشه بتكون بسبب التهابات وتلف أعصاب الرقبه و الجلطات وبتتحسن مع الانتظام في اضافه فيتامين C أو الاسبرين مع ه سبلنيوم و مجموعه فيتامين ب وخصوصا ب ١٢ و استخدام رافع مناعه جيد مثل روبديار و التحسن بيختلف حسب شده الاصابه و ارتفاع مناعه الطائر أو الحيوان
نسئلكم الدعاء
مهندس زراعي / سامح محمد
( كن شريك في الثواب - شير تؤجر )
تعليقات
إرسال تعليق